Forým jumysyna QHR Memlekettik týrızm basqarmasy tóraǵasynyń orynbasary DÝ Szıan, QR Mádenıet jáne sport mınıstrliginiń Týrızm ındýstrııasy komıtetiniń tóraıymy M.Mýrzamadıeva, Ońtústik Qazaqstan oblysynyń ákimi J.Túımebaev, «Kazakh tourism» ulttyq kompanııasynyń tóraǵasy R.Kúzembaev, «Atameken» UKP ókilderi, halyqaralyq jáne qazaqstandyq týroperatorlar, ınvestısııalyq kompanııalar, týrısttik assosıasııalar men sheteldik jáne qazaqstandyq BAQ jalpy sany 500-ge jýyq adam qatysýda.
Ońtústik óńirine qosh keldińizder degen oblys ákimi J.Túımebaev Ońtústik Qazaqstan oblysy búgingi tańda myqty ekonomıkalyq áleýeti bar, turaqty damyp kele jatqan óńir ekenin atap ótti.
«Aımaq Orta Azııa, Taıaý Shyǵys pen Eýropa elderin baılanystyratyn joldardyń qıylysynda ornalasqan. Nátıjesinde – shekaralyq saýda-sattyq pen eksporttyq óndiris órkendep, oblysymyzdyń týrıstik tartymdylyǵy kóbeıip, tamashalaýǵa kelýshi týrıster sany jyl saıyn ósip keledi. Sondaı-aq, óńirimizdiń jaǵymdy ınvestısııalyq ımıdji qalyptastyrylyp, ulǵaııýda. Máselen, ótken jylmen salystyrǵanda týrıstik nysandar sany oblysta 31 paıyzǵa ósip, 195-ti qurady. Olarda kórsetilgen qyzmetter kólemi 43 paıyzǵa kóbeıip, 1,7 mlrd.teńgege jetti. Osynyń nátıjesinde bıyl Ońtústik Qazaqstan oblysyna 128 myń týrıst kelse, bul ótken jylmen salystyrǵanda 55 paıyzǵa artqanyn kórsetedi»,-dedi J.Túımebaev.
Sonymen qatar ákim Ońtústikke kelýshi týrısterge qolaıly jaǵdaı jasaý maqsatynda 1, 2 jáne 3 kúndik týrıstik marshrýttar ázirlenip, atalǵan marshrýtqa 84 tarıhı-mádenı obektiler men tabıǵı oryndar engizilgenin jetkizdi. Sondaı-aq, ol «Uly Jibek joly eskertkishteri» atalymy boıynsha 8 eskertkish ıaǵnı, Saýran, Túrkistan, Sıdaq, Qaraspan, Jýantóbe, Kúltóbe, Otyrar, Bórjar eskertkishteri Ońtústik óńirinde ornalasqanyn aıtty.
Mádenıet jáne sport mınıstrligi men Ońtústik Qazaqstan oblysy ákimdigi uıymdastyrýymen ótip jatqan is-sharada týrızm salasyndaǵy áleýetti jobalar tanystyrylyp, olardy júzege asyrý joldary talqylanýda. Sala mamandarynyń basy qosylǵan jıynda sonymen birge Uly Jibek jolynda týrızm ındýstrııasyn damytýdyń ózekti máseleleri men Jibek joly boıyndaǵy týrıstik ónimderdi damytý, óńirdiń ınvestısııalyq múmkindikterin tanystyrý jáne ınvestorlardy tartý jaıy qaralmaq. Sondaı-aq, qatysýshylar áleýetti seriktestermen V2V formatynda kezdesýlerge qatysyp, otandyq jáne halyqaralyq deńgeıdegi sarapshylarmen suhbattasatyn bolady. Kelýshi qonaqtar sonymen birge Qazaqstannyń Jibek jolyna arnalǵan fotokórme, «Silk Road Fair» týrıstik jármeńkesin tamashalady.
